Os trámites para os que podes solicitar cita presencial son:

• A presentación dos modelos de autoliquidación 600, 620, 650, 651 e 660.

  Requisitos para a presentación presencial:

  • Modelo de autoliquidación debidamente cuberto que poderás confeccionar na OVTributaria ou adquirilo nos estancos autorizados, Oficinas de distrito hipotecario e Oficinas liquidadoras de distrito hipotecario.
  • Ingreso da cota tributaria, sen prexuízo da posibilidade de presentar solicitude de aprazamento ou fraccionamento na forma, lugar e prazo que determine a normativa tributaria.
    
    Se a cota tributaria a ingresar é igual ou inferior a 3.000€ podes pagar mediante tarxeta de débito ou crédito no Terminal Punto de Venda (TPV) físico da Delegación da Atriga ou nunha entidade financeira colaboradora; se é superior a 3.000€ deberá ser ingresada nunha entidade financeira colaboradora.
    
    NOTA: As Oficinas Liquidadoras de Distrito Hipotecario e as de Distrito Hipotecario NON teñen TPV físico para realizar o pago nas oficinas.
  • Achegar a documentación requirida que podes consultar nas guías dos impostos. A documentación deberá presentarse sen grampas, clips, espirais, encadernado ou calquera outro medio que dificulte a súa dixitalización.
    Se a presentación dos impostos se realiza por un terceiro distinto ao suxeito pasivo, deberase aportar o correspondente modelo de representación.
• Solicitar certificado de ausencia de débedas.
• Información sobre algún expediente existente ou trámite administrativo consecuencia dun procedemento de xestión ou recadación cuxa competencia corresponda a órganos da Axencia Tributaria de Galicia.
• Información tributaria xeral sobre transmisións patrimoniais, vehículos, sucesións, doazóns, recadación, tributación sobre o xogo, tributos propios, taxas e patrimonio.
• Solicitar asistencia na confección dos modelos 600 e 620.

Os trámites para os que podes solicitar cita para atención telefónica son:

• Información sobre algún expediente existente ou trámite administrativo consecuencia dun procedemento de xestión, recadación ou embargo cuxa competencia corresponda a órganos da Axencia Tributaria de Galicia.
• Información tributaria xeral sobre transmisións patrimoniais, vehículos, sucesións, doazóns, tributos e procedementos, recadación, embargos, tributación sobre o xogo, tributos propios, taxas, imposto de patrimonio e imposto sobre o depósito de residuos.
• Solicitar asistencia na confección dos modelos 600 e 620.

Para solicitar cita no curso dun procedemento inspector, debes chamar ao número de teléfono que figura no escrito de comunicación de inicio de dito procedemento.

A presentación de escritos referidos a un expediente e de solicitudes podes facela nos Rexistros da Xunta de Galicia ou por calquera outro dos medios que estipula a Lei 39/2015, do 1 de outubro. Se tes certificado dixital, DNI electrónico ou Chave 365 podes presentalos na sede electrónica da Xunta de Galicia polo Procedemento PR004A.

As alegacións, recursos ou contestación a requirimentos da Atriga, podes presentalos a través da Oficina Virtual Tributaria (OVT) da Atriga, se o documento notificado conta con Código Seguro de Verificación e dispós de certificado dixital ou DNI electrónico. Tamén podes presentar a través da OVT da Atriga as solicitudes de aprazamento e fraccionamento de débedas, de compensación de débedas, de devolución de ingresos indebidos e de prórroga ou de suspensión do imposto de sucesións.

A presentación electrónica das autoliquidacións e, se é o caso, da súa documentación complementaria ten carácter obrigatorio para as seguintes persoas ou entidades, agás nos casos excepcionados:

- As persoas xurídicas.

- As entidades sen personalidade xurídica ás que se refire o artigo 35.4 da Lei 58/2003, do 17 de decembro, xeral tributaria.

- As persoas que representen a un contribuínte que estea obrigado á presentación e pago electrónico.

- As persoas ou entidades que, de acordo co que prevé o artigo 92 da Lei 58/2003, do 17 de decembro, xeral tributaria, teñan a condición de colaboradores sociais na aplicación dos tributos e cumpran os requisitos e as condicións que estableza a normativa vixente.

Excepcións á presentación electrónica obrigatoria:

- Modelo 620: Nos casos en que non se poida obter a validación do vehículo da Dirección Xeral de Tráfico e nos casos en que o vehículo teña matrícula estranxeira; Autoliquidacións complementarias.

- Modelo 600: Autoliquidacións complementarias

- Modelo 650: Entre outras: Liquidación no caso de herdeiros descoñecidos, a renuncia cando o renunciante ten un grupo de parentesco co causante superior ao que lle corresponde ao beneficiario, o usufruto sucesivo cando entra o segundo usufrutuario, a substitución fideicomisaria, a consolidación de dominio nun terceiro distinto do nu propietario e dereito de uso e habitación cando se constitúe xunto co dereito de usufruto e a liquidación de seguros de vida anteriores a 1987 da disposición transitoria cuarta da Lei 29/1987, do 18 de decembro, do imposto de sucesións e doazóns.

- Modelo 651: Entre outras: A presentación de complementarias, a doazón de bens cando non todos están na Comunidade Autónoma de Galicia; o usufruto simultáneo a favor de cónxuxes e o dereito de uso e habitación cando se constitúe xunto co dereito de usufruto.